Fréttir eftir árum

Fyrirlesturinn Ræktun matjurta í garði og á svölum var haldinn í Bókasafninu þriðjudaginn 7. maí sl. Jóhanna B. Magnúsdóttir garðyrkjufræðingur sá um fræðsluna og tæplega fimmtíu manns mættu. Gestir fóru heim með góð ráð í grænmetisgarðinn.

Í maí spyrjum við um sumarfrí, tónelska og grænklædda vini og hárprúðar prinsessur í vanda. Dregið verður úr réttum svörum í byrjun júní og einn heppinn krakki fær bók í verðlaun. Við vekjum athygli á því að bráðum fer barnagetraun Bókasafnsins í sumarfrí og því verður engin getraun í júní, júlí og ágúst.

Bókasafnið er lokað miðvikudaginn 1. maí

Bókasafnið lokað á fimmtudaginn 25. apríl, sumardaginn fyrsta.

Í níunda sinn var Mosfellingum og gestum þeirra boðið til Menningarvors í Bókasafni Mosfellsbæjar.

Bókasafnið verður lokað skírdag, föstudaginn langa og annan í páskum en óbreyttur afgreiðslutími laugardaginn 20. apríl frá kl. 12.00-16.00. Gleðilega páska.

Katrín Kristjánsdóttir íslenskukennari í Vín þakkar Bókasafninu fyrir blöð og bækur: Krakkarnir voru ekkert smá ánægð með Andrés Önd og einhverjir foreldrar fóru líka heim með bækur til að lesa sjálf ;) Flotta Víkingabókin kom eins og himnasending þar sem krakkarnir hafa verið að læra mikið um Víkingana í vetur! Takk kærlega fyrir okkur þvílíkar gjafir sem við fengum og enn meira kemur með flugi um páskana til okkar.

Sigurrós Ingimarsdóttir vann marsgetraun Bókasafnsins. Hún er í 4. bekk í Krikaskóla og æfir auk þess fótbolta. Sigurrós kemur reglulega til okkar í safnið með mömmu sinni eða vinkonunum. Uppáhaldsbókin hennar er Matthildur en það er einmitt bókin sem hún fékk í verðlaun! Svo er líka gaman að segja frá því að Sigurrós á afmæli á morgun og verður 10 ára. Til hamingju!

Laugardaginn 30. mars sl. var opnuð ný sýning í Listasal Mosfellsbæjar. Sýningin Hamur er fimmta einkasýning Hildar Ásu Henrýsdóttur sem er ung listakona ættuð af Langanesi. Verk Hildar Ásu eru óvægin og kraftmikil og er listakonan óhrædd við að nota sjálfa sig sem efnivið. Umfjöllunarefni sýningarinnar eru þeir rammar sem samfélagið hefur smíðað utan um konur og kvenleikann. Við hvetjum fólk til að láta þessa áhrifamiklu sýningu ekki framhjá sér fara. Sýningin er opin kl. 12-18 á virkum dögum og kl. 12-16 á laugardögum. Ókeypis aðgangur og allir velkomnir.

Laugardaginn 30. mars síðastliðinn bauð Bókasafnið börnum að koma í safnið og lesa sér til ánægju fyrir sérþjálfaða hunda. Viðburðurinn er í samstarfi við félagið Vigdísi - Vini gæludýra á Íslandi en það er aðili að lestrarverkefninu R.E.A.D – Reading Education Assistance Dogs sem starfar um allan heim. Tíkurnar Hekla og Skotta komu ásamt eigendum sínum þannig að tvö börn gátu lesið í einu. Þetta tókst afar vel og komust færri að en vildu. Stefnt er að því að vera með Hunda sem hlusta aftur í haust. Hér má sjá Ástu með Skottu og Sigurlaugu með Heklu.