Kona febrúarmánaðar er Birta í Dalsgarði

Birta Fróðadóttir í Dalsgarði er kona febrúarmánaðar 2015. Bókasafnið og Héraðsskjalasafnið hafa tekið höndum saman og kynna mánaðarlega konu og/eða konur sem tengjast Mosfellsbæ. Þetta er unnið í tilefni af því að 100 ár eru liðin frá því að konur á Íslandi fengu kosningarétt.

Birthe Brow Sørensen fæddist á Sjálandi í Danmörku 17. október 1919. Hún lést 7. ágúst 1975. Birta lauk námi í húsgagnasmíði 1942 og síðar þriggja ára námi í innanhússarkitektúr frá Skolen for indendørsarkitektur. Birta Fróðadóttir var það nafn sem hún valdi þegar hún varð íslenskur ríkisborgari. Birta giftist Jóhanni Jónssyni 16. október 1943 og fóru þau heim til Íslands með Esjunni í júlí 1945.
Saman stofnuðu þau og starfræktu garðyrkjustöðina Dalsgarð. Þau eignuðust átta börn.

Í tilefni kynningar á konu febrúarmánaðar munu Dalsgarðsfólkið hittast í kaffi á Bókasafninu fimmtudaginn 5. febrúar kl. 15:30. Það verður heitt á könnunni og allir velkomnir.